1950-ൽ ഗാലക്സിയുടെ പ്രഭാമണ്ഡലത്തിനു വെളിയിലായി സാന്ദ്രതയേറിയ ഒരു വാതക പടലത്തെ കണ്ടെത്തിയിരുന്നു. അന്ന് അതിന്റെ ചലനാവസ്ഥ കണ്ടെത്താൻ കഴിഞ്ഞിരുന്നില്ല. എന്നാൽ 1963 ൽ നടത്തിയ നിരീക്ഷണത്തിൽ ആ വാതക പടലം മിൽക്കി വേയുടെ പ്രഭാ മണ്ഡലത്തിലേക്ക് സഞ്ചരിക്കുന്നതായി കണ്ടെത്തി, അങ്ങിനെയാണ് HV- മേഘങ്ങൾ എന്ന ജ്യോതിർ വസ്തുവിനെക്കുറിച്ച് പഠനങ്ങൾ തുടങ്ങിയത്. ആ മേഘ പടലങ്ങളിൽ നിന്നുള്ള ന്യൂട്രൽ ഹൈഡ്രജൻ റേഡിയോ ഉത്സർജനത്തിന്റെ(Neutral Hydrogen Radio Emission) അടിസ്ഥാനത്തിലാണ് ഇവയുടെ ചലനാവസ്ഥയെ നിർണയിക്കാൻ സാധിച്ചത്. കാരണം അന്നു കണ്ടെത്തിയ HV-മേഘങ്ങളിൽ നിന്നും ന്യൂട്രൽ ഹൈഡ്രജൻ റേഡിയോ തരംഗങ്ങളെ കണ്ടെത്തിയിരുന്നു. എന്താണ് ന്യൂട്രൽ ഹൈഡ്രജൻ റേഡിയോ എമിഷൻ? . ന്യൂട്രൽ അവസ്ഥയിലുള്ള ഹൈഡ്രജൻ ആറ്റങ്ങൾ തമ്മിലുള്ള ഊർജവസ്ഥയിലുള്ള(Energy State ) മാറ്റത്തിന്റെ പരിണിത ഫലമായുള്ള വൈദ്യുത കാന്തിക തരംഗങ്ങളാണ്, ന്യൂട്രൽ ഹൈഡ്രജൻ തരംഗങ്ങൾ. റേഡിയോ അസ്‌ട്രോണോമിയിൽ ഇത്തരം തരംഗങ്ങൾക്ക് പ്രാധാന്യമുണ്ട്. നക്ഷത്ര ധൂളികളെയും മേഘ പടലങ്ങളെയും തുളച്ചു കയറി വരുന്നതിനാൽ ജ്യോതി ശാസ്ത്രത്തിൽ ഇവയെ പഠനത്തിനെടുക്കാറുണ്ട്. ഈ തരംഗങ്ങളുടെ അടിസ്ഥാനത്തിലാണ് മേല്പറഞ്ഞ HV- മേഘങ്ങളുടെ ചലനാവസ്ഥ നിർണയിക്കാൻ കഴിഞ്ഞത്.
HV-മേഘങ്ങൾക്ക് രണ്ടു ഭാഗമാണുള്ളത്. ഘനീഭവിച്ചതും സാന്ദ്രതയേറിയതുമായ ന്യൂട്രൽ ഹൈഡ്രജനാൽ നിർമിതമായ ഒരു ഭാഗവും, 10^4 കെൽവിനും 10^6 കെൽവിനും ഇടയിൽ താപനിലയുള്ള അയണീകരിച്ച മറ്റൊരു ഭാഗവുമാണ്. UV, X-റേ നിരീക്ഷണങ്ങളിലൂടെയാണ് ഇവയെ കണ്ടെത്തുന്നത്, ബഹിരാകാശ നിരീക്ഷണ ടെലിസ്കോപ്പുകൾ കൂടാതെ ഗ്രൗണ്ട് ടെലിസ്കോപ്പുകൾ മുഖേനയും ഇവയെ നിരീക്ഷിക്കാവുന്നതാണ്. HV-മേഘങ്ങളുടെ ബാഹ്യ ഭാഗങ്ങൾ പൊതുവെ അയണീകരിച്ചു കാണപ്പെടുന്നതിനു കാരണം ഇവ അതി വേഗതയിൽ ഗാലക്സിയുടെ പ്രഭാമണ്ഡലത്തിലേക്ക് വ്യാപിക്കുന്നത് മൂലമുള്ള ചലനമാണ്. HV മേഘങ്ങൾക്ക് നൂറു മില്യൺ വർഷങ്ങൾ വരെ ആയുസ് ഉണ്ടാകാമെന്നു കരുതുന്നു