യക്ഷി

ആരെങ്കിലും യക്ഷിയെ കണ്ടിട്ടുണ്ടോ? ഉണ്ടാകും എന്ന് ഞാൻ കരുതുന്നില്ല. എന്താണ്, ആരാണ് യക്ഷി? പാലമരത്തിൽ വസിക്കുന്ന, രക്തം ഊറ്റി കുടിക്കുന്ന ഒരു ക്ഷുദ്ര ശക്തി അല്ലെ? ഒരിക്കലുമല്ല എന്ന് ഞാൻ ഉറപ്പിച്ചു പറയുന്നു.

പ്രണയത്തിന്റെ മൂർത്തിമദ്ഭാവമാണ് യക്ഷി. അവളുടെ പ്രണയം തീവ്രമാണ്. അത്രയും തീവ്രമായ പ്രണയം സാധാരണമല്ല. വേർപാടിന്റെ, ഹൃദയം നുറുങ്ങുന്ന വേദനയുടെ, ചതിയുടെ, കണ്ണീരിന്റെ ഗന്ധമാണവളുടെ കഥയ്ക്ക്.

അതിസുന്ദരിയാണവൾ. പൗര്ണമിയെ ഇഷ്ടപ്പെടുന്നവൾ. പ്രണയിക്കുന്ന പുരുഷനെ പ്രാണന് തുല്യം കരുതുന്നവൾ. അവനു വേണ്ടി എന്ത് ത്യാഗവും സഹിക്കുന്നവൾ. അവളുടെ പ്രണയം അനുഭവിക്കാനും ഒരു നിയോഗം വേണം. ജീവിതത്തിൽ ഒരുവന് വേണ്ടി മാത്രമേ അവൾ മനസ്സിന്റെ വാതായനങ്ങൾ തുറന്നിടൂ.

പൗര്ണമിയിൽ അവളുടെ സൗന്ദര്യം അതിന്റെ പാരമ്യത്തിലെത്തുന്നു. അവളുടെ ശരീരത്തിന് അന്ന് പാലപ്പൂവിന്റെ ഗന്ധമാണ്. നായകളുടെ ഓരിയിടൽ അവൾക്കു സംഗീതമാണ്. കടവാതിലുകൾ എല്ലായിടത്തും അവൾക്കു അകമ്പടി സേവിക്കുന്നു. ഹിംസ്രജന്തുക്കൾ (മൃഗങ്ങളും മനുഷ്യരും) അവളുടെയടുത്ത് ഇണക്കത്തോടെ പെരുമാറുന്നു. പൗര്ണമിയുടെ ശോഭ അവളുടെ ശരീരത്തിൽ പ്രതിഫലിക്കുന്നു. അന്നവളുടെ വദനം ദിവ്യമായ ഒരു ഓറയാൽ പ്രശോഭിതമാകുന്നു.
ഐശ്വര്യത്തിന്റെ ദേവതയാണവൾ. അവൾ ഇരിക്കുന്നിടം ധനം കൊണ്ട് നിറയും. കുബേരന്റെ സദസ്സിലെ ദാസികളത്രെ യക്ഷികൾ. യക്ഷികൾ ദുഷ്ടകളല്ല. നഷ്ടപ്രണയം അവരെ പ്രതികാരദാഹികളാക്കുന്നു എന്ന് മാത്രം. യക്ഷികളുടെ പ്രണയത്തിനു പാത്രമായവർ പിന്നീടൊരിക്കലും വേറൊരു സ്ത്രീയെക്കുറിച്ചു ചിന്തിക്കപോലും ചെയ്യാൻ കഴിയില്ല. അത്രയ്ക്ക് പരിശുദ്ധമായി വേണം അവരെ പ്രണയിക്കാൻ. പ്രണയത്തെ ഒരു ഉപാസനയായി കാണുന്നവർക്ക് മാത്രമേ അവളെ സ്വന്തമാക്കാൻ സാധിക്കൂ.

ഒന്നു നോക്കൂ, കള്ളിയങ്കാട്ട് നീലി. അവളെ ചതിക്കയല്ലേ ചെയ്തത്? അവൾ രക്തദാഹിയായത് നഷ്ടപ്പെട്ട പ്രണയം മൂലമല്ലേ? കാഞ്ഞിരംകോട്ട് യക്ഷി. അവളുടെ കഥയും വ്യത്യസ്തമല്ല. മേലാള വർഗം അവരുടെ നീചത്വം മറക്കാൻ വേണ്ടി ബുദ്ധിപൂർവം ചമച്ചതാണ് "രക്തദാഹി" എന്ന പട്ടം.
കടപ്പാട്: ഒരടുത്ത സുഹൃത്തു.